Víkingarnir Magnea og Eyrún sigurvegarar Íslandsmóts unglinga

Víkingarnir Magnea J. Ólafs og Eyrún Elíasdóttir sigruðu þrefalt á Íslandsmóti unglinga 2010 sem fram fór í Íþróttahúsi Kennaraháskólans 20.-21. mars, í einliðaleik, tvíliðaleik og tvenndarkeppni.

Magnea J. Ólafs sigraði í einliðaleik í flokki 19-21 árs stúlkna, í tvíliðaleik stúlkna 19-21 árs með Eyrún Elíadóttur og í tvenndarkeppni undir 21 árs með Davíð Teitssyni Víkingi. Magnea sigraði jafnframt í liðakeppni stúlkna undir 21 árs sem fram fór í febrúar og sigraði því fjórfalt á Íslandsmótum unglinga 2010.

Davíð Teitsson Víkingi, auk þess að verða Íslandsmeistari í tvenndarkeppni með Magneu, varð jafnframt í öðru sæti í einliðaleik og tvíliðaleik í flokki 19-21 árs eftir tvísýna leiki.

Eyrún, auk þess að sigra í tvíliðaleik með Magneu, sigraði í einliðaleik í flokki 16-18 ára stúlkna og í tvenndarkeppni 16-18 ára með Sindra Þór Sigurðssyni Víkingi. Athyglisverður árangur hjá henni og þau Sindri og Eyrún, sem bæði eru í 2. flokki, ruddu meðal annars úr vegi pari með meistaraflokksleiksmanni úr KR í leið sinni að titlinum í tvenndarkeppninni.

Sindri sýndi að hann er í mikilli framför, sigraði í tvenndarkeppni 16-18 ára, og varð í öðru sæti í einliðaleik og í tvíliðaleik náðu hann og Daníel Bergmann Ásmundsson félagi hans úr Víkingi öðru sæti. Þeir Sindri og Daníel töpuðu í úrslitum tvíliðaleiks fyrir blönduðu liði Víkings og KR þar sem Víkingurinn Markús Brekke Þorfinnsson lék með Jóhannesi Tómassyni. Markús stóð sig vel og varð jafnframt í 3.-4. sæti í einliðaleik 16-18 ára en hann kom gagngert frá Noregi til að taka þátt í mótinu.

Í flokki 12-13 ára drengja stóð Logi Ágústsson Víkingi sig ákaflega vel. Hann sigraði í tvíliðaleik með Jóhanni Hrafni Sigurjónssyni Víkingi og varð í öðru sæti í einliðaleik eftir jafnan úrslitaleik við Pétur Andrésson HK.