Gott gengi hjá 5. flokki karla í handbolta.

5.flokkur karla sendi tvö lið til leiks á Gróttu mótið á Seltjarnarnesi sem er hluti af Íslandsmótinu. A-liðið leikur í efstu deild og B-liðið í þeirri þriðju eftir að hafa unnið deildina fyrir neðan mjög sannfærandi á mótinu á undan. Nokkuð var um væntingar fyrir þetta mót enda hafa strákarnir verið að æfa gríðarlega vel seinustu mánuði, A-liðið setti sér markmið í haust að enda veturinn í efstu 3 sætunum meðan B-liðið ætlaði að halda áfram á sömu braut og á síðasta móti. Liðin byrjuðu misvel en A-liðið vann sannfærandi sigur í fyrsta leik meðan B-liðið byrjaði á hælunum. Þetta var það sem koma skildi í mótinu, á laugardeginum vann svo A liðið frábæran sigur á Selfossi sem hefur unnið fyrstu tvö mótin til þessa, nú þurftu þeir bara að klára seinustu tvo leikina sem voru gegn FH og Gróttu. FH var enginn fyrirstaða og því var seinasti leikurinn spurningin um sigur á mótinu. Strákarnir leiddu í hálfleik en náðu ekki að fylgja því eftir í seinni hálfleik og enduðu mótið með eins marks tapi sem þýddi að lokum 2-3 sæti sem fyrirfram hefðu verið fín úrslit en að lokum heldur sár. B-liðið stóð sig vel eftir erfiða byrjun og náðu að halda sér uppi í 3.deildinni en þeir eru margir hverjir að taka sín fyrstu skref í handbolta, leiðin liggur bara upp á við hjá þeim.

Mikill og ör vöxtur hefur verið á þessum flokki á undanförnum mánuðum sem er líklega að fara skila sér í 3.liðinu á yngra árinu og jafnvel verður hægt að senda lið til leiks á eldra árinu líka. Það eru spennandi tímar framundan hjá þessu flokk og verður gaman að fylgjast með þeim á komandi árum.