Knattspyrna, æfingagjöld 2010

Æfingagjöld knattspyrnudeildar fyrir 2010 verða óbreytt frá árinu 2009 og gildir einu hvort allt árið er gert upp í einu lagi eða árinu skipt í tvo áfanga (janúar-september og október-desember). Í fyrra var veittur lítilsháttar afsláttur ef greitt var fyrir 1. mars en ákveðið er að falla nú frá slíku fyrirkomulagi í ljósi reynslunnar. Tiltölulega fáir nýttu sér afsláttinn með staðgreiðslu árgjalds fyrir settan tíma en þessi sérkjör gerðu hins vegar innheimtuna flóknari en svo að eftirsóknarvert væri í reynd að bjóða þau.

Fjárstuðningur Reykjavíkurborgar samkvæmt Frístundakorti er óbreyttur frá í fyrra og mjög mikilvægt fyrir rekstur Víkings að foreldrar úthluti félaginu frístundastyrknum nú þegar svo unnt sé til dæmis að greiða þjálfurum laun sín á réttum tíma. Við heitum á foreldra að vera skilvísir og ganga sem fyrst frá æfingagjöldunum til að reksturinn gangi eðlilega fyrir sig og komist verði hjá eftirrekstri og ítrekun. Innheimtan er að miklu leyti sjálfboðaliðastarf eins og svo margt annað á vettvangi Víkings.

·         Gjalddagi fyrra tímabils (janúar-september) er 1. apríl. Þeir sem ætla að nýta frístundastyrk Reykjavíkurborgar upp í æfingagjaldið eru vinsamlega beðnir um að millifæra hann strax og eigi síðar en 15. febrúar. Greiðsluseðill verður svo sendur fyrir eftirstöðvum í byrjun mars.

·         Gjalddagi seinni tímabils (október-desember) er 15. október.

Víkingur veitir sem fyrr systkina- og fjölgreinaafslátt. Afsláttur er 10% ef eitt systkin er að æfa hjá Víkingi, 20% ef tvö systkin æfa o.s.frv. Við bætist 10% afsláttur ef iðkandi æfir aðra íþrótt hjá Víkingi. Afsláttur verður þó aldrei meiri en 30%.  Dæmi:

Iðkandi er í 7. flokki, æfir einnig handbolta og á eitt systkin sem æfir hjá Víkingi. Fullt árgjald er 42.000 kr. en afsláttur er 20% eða 8.400 kr. (10% vegna annarrar íþróttar og 10% vegna systkinis). Iðkandi greiðir þá 33.600 kr. í síðasta lagi 1. apríl.

Ef greitt er fyrir tímabilið janúar-september er fullt gjald 31.500 kr. og 20% afsláttur frá því er 6.300. Iðkandi greiðir þá 25.200 kr. fyrir 1. apríl. Hann fær einnig 20% afslátt af haustgjaldinu eða 2.100 kr. Hann greiðir þá 8.400 kr. (10.500 kr. - 2.100 kr.) fyrir 15. október.

Gjöldin má greiða með því að millifæra frístundastyrk borgarinnar, millifæra af eigin reikningi í heimabanka eða með skuldfærslu á kreditkorti.

Frístundastyrkur Reykjavíkurborgar fyrir árið 2010 er 25.000 krónur á barn fyrir öll börn fædd á árunum 1992-2004 með lögheimili í Reykjavík. Úthlutun hans fer fram á vef borgarinnar rvk.is, sjá hér: https://rafraen.reykjavik.is/pages/ . Ef aðgangsorð eru gleymd má fá þau send tafarlaust í tölvupósti frá vefnum. Þess ber að geta að búið er að skrá alla núverandi iðkendur inn á Rafræna Reykjavík og er æfingagjald skráð 25.000 kr. hjá öllum eða sem nemur hámarksstyrk. Það er til þess að fólk geti úthlutað allt að hámarksstyrk en raunveruleg krafa ræðst svo af ýmsum breytum sem ekki eru allar þekktar þegar þetta er ritað svo sem hver ástundun iðkanda verður, ástundun systkina, fyrri skuld eða inneign o.s.frv.

·         Mismun á æfingagjaldi sem greiða skal og úthlutun frístundastyrks má gera upp með millifærslu á eftirfarandi reikning:

0323-26-018888

Kt. 700693-2529

Kr. _________

Netfang: oliola@vikingur.is

Skýring: <Skírnarnafn iðkanda, x.fl. kk/kvk>

Einnig má standa skil á mismun með því að hafa samband við skrifstofu Víkings og ganga frá kreditkortagreiðslu/m.

Það skal tekið fram að ef barn eða ungmenni hættir iðkun íþrótta hjá Víkingi á viðkomandi rétt á endurgreiðslu æfingagjalds umfram frístundastyrkinn og þann tíma sem iðkandi hefur stundað æfingar. Barna- og unglingaráð tekur við slíkum umsóknum og afgreiðir þær. Reynslutími nýrra iðkenda er einn mánuður. Haldi barnið ekki áfram að reynslutíma loknum þarf ekki að greiða æfingagjald.

Við endurtökum í lokin:

Mikilvægt er fyrir starfið að greitt sé sem fyrst og sér í lagi að frístundastyrk sé úthlutað fyrir 15. febrúar. Það hefur einnig mikið að segja til að útsendir greiðsluseðlar og/eða kröfur á eftirstöðvar í heimabanka í byrjun mars verði réttar. Við biðjum ykkur því að hjálpa okkur við að gera innheimtuna bæði skjóta og skilvirka.

Bestu kveðjur frá Barna- og UnglingaRáði

ÁFRAM VÍKINGUR !