2. fl.kvenna: Markverðir í aðalhlutverkum

HK/Víkingur tók á móti Haukum á Íslandsmóti 2. flokks kvenna í sól og blíðu í Víkinni í kvöld. Haukar höfðu betur, 3:1, í leik sem bauð uppá fjölda góðra marktækifæra en markverðirnir sáu til þess að mörkin urðu ekki helmingi fleiri en fjögur.

Það voru Margrét Ýr Björnsdóttir í marki HK/Víkings og jafnaldra hennar og HK-ingur í marki Hauka, Regína Jónsdóttir, sem voru í aðalhlutverkum og vörðu hvað eftir annað mjög vel.

Haukar náðu forskoti strax á fyrstu 10 mínútunum með því að komast í 2:0 og þannig stóð í hálfleik þrátt fyrir nokkur góð færi á báða bóga. Guðrún Hermannsdóttir var næst því að skora fyrir HK/Víking þegar hún skaut í þverslána, niður í aðra stöngina, þaðan í hina og út...!

Elma Lára Auðunsdóttir kom inná sem varamaður hjá HK/Víkingi í hálfleik og hennar fyrsta verk var að æða upp vinstri kantinn og alla leið inní vítateig þar sem hún lagði boltann snyrtilega í hornið fjær, 2:1.

Eftir það skiptust liðin á færum, Haukarnir voru þó heldur ágengari og náðu m.a. að skjóta yfir mark HK/Víkings úr vítaspyrnu. Þeim lánaðist að skora þriðja markið eftir að Margrét hafði varið tvisvar glæsilega úr dauðafærum og hinum megin kom Regína í veg fyrir að mörk HK/Víkings yrðu fleiri.

Frétt af heimasíðu HK

Mynd 1: Ingibjörg Björnsdóttir og Telma Dögg Óskarsdóttir í varnarbaráttu gegn framherja Hauka.
Mynd 2: Berglind Anna Víðisdóttir lék í vörninni í fyrri hálfleik og á miðjunni í þeim síðari.
Mynd 3: Elma Lára Auðunsdóttir gerði usla í vörn Hauka í seinni hálfleik og skoraði gott mark.