Naumt tap í haustkulda á Sauðárkróki

HK/Víkingur lauk í kvöld keppni í 1. deild kvenna á Íslandsmótinu þetta árið með því að spila við Tindastól/Neista norður á Sauðárkróki. Norðanstúlkur höfðu betur, 2:1, en það var Sólveig Þórarinsdóttir sem skoraði mark HK/Víkings og jafnaði þá 1:1 snemma í seinni hálfleiknum.

Sigurrós María Sigurbjörnsdóttir spilaði sinn 100. leik fyrir meistaraflokk HK/Víkings í kvöld.

Þriðja sætið í A-riðli var þegar í höfn hjá HK/Víkingi fyrir leikinn og liðið er sex stigum á undan Tindastóli/Neista þrátt fyrir þessi úrslit.

Staðan í riðlinum.

Það var hrollkalt á Sauðárkróki og nokkur vindur. Heimastúlkur léku undan honum í fyrri hálfleik og sóttu látlaust án þess að skapa sér teljandi færi framan af leik. Vörn HK/Víkings hélt vel og baráttan var góð. Tindastóll/Neisti náði að skora uppúr hornspyrnu og staðan var 1:0 í hálfleik.

Seinni hálfleikur hófst með stórsókn HK/Víkings. Sólveig skoraði með þrumuskoti eftir hornspyrnu og jafnaði, 1:1, á 59. mínútu. Heimaliðið skoraði þvert gegn gangi leiksins tíu mínútum síðar og það reyndist sigurmarkið í leiknum, 2:1.

"Við fórum úr sumarveðri í borginni í haustkulda á Króknum og það setti líka svip á leikinn að sterkur vindur stóð á annað markið. Eftir góða frammistöðu í fyrri hálfleik þá áttum við dapran leik í þeim seinni. Erfiðlega gekk að halda boltanum innan liðsins og að skapa færi. Við vorum með yfirhöndina þegar við jöfnuðum og þá vantaði bara að reka smiðshöggið á verkið. Eftir að heimadömur komust yfir aftur þá fækkuðum við í vörninni, leikurinn opnaðist við það en við náðum ekki að bæta við," sagði Sigurður Víðisson þjálfari HK/Víkings.

Lið HK/Víkings var þannig skipað:

Markvörður:
Karen Ósk Þórisdóttir

Varnarmenn:
Berglind Anna Víðisdóttir (Lovísa Þorsteinsdóttir 46.)
Ingibjörg Björnsdóttir 
Sólveig Þórarinsdóttir 
Eva Eðvaldsdóttir 

Tengiliðir:
Heiður Loftsdóttir 
Sigurrós María Sigurbjörnsdóttir 
Valgerður Tryggvadóttir 

Framherjar:
Hildigunnur Sól Eldjárn (Sólrún Sigvaldadóttir 82.)
Kristín Ósk Óskarsdóttir 
Hjördís H. Sigurðardóttir (Guðrún Anna Atladóttir 82.)

Meiddar og utan hóps:
Anna Daníelsdóttir 
Arndís Rós Stefánsdóttir 
Elísabeth Ásgeirsdóttir
Guðrún Hermannsdóttir (leikbann)
Inga Lára Óladóttir 
Ingibjörg Sigvaldadóttir 
Kristín Lilja Friðriksdóttir 
Margrét Ýr Björnsdóttir 
María Rún Gunnlaugsdóttir 
Mjöll Einarsdóttir
Sif Ólafsdóttir 
Tinna Óðinsdóttir 
Anna Margrét Benediktsdóttir (3.fl.)
Diljá Helgadóttir (3.fl.)
Glódís Perla Viggósdóttir (3.fl.)
Hugrún Friðriksdóttir (3.fl.)
Natalía Reynisdóttir (3.fl.)
Rakel Lind Ragnarsdóttir (3.fl.)
Sigurrós Halldórsdóttir (3.fl.)
Unnbjörg Jóna Ómarsdóttir (3.fl.)

* Fjórtán leikmenn HK/Víkings tóku þátt í leiknum. Ingibjörg Björnsdóttir var eini leikmaðurinn sem spilaði alla 22 mótsleikina á árinu og Heiður kom næst með 20 leiki. Sjá nánar: Leikmenn meistaraflokks kvenna 2010.

* Sigurrós lék sinn 100. meistaraflokksleik og er sú fimmta frá upphafi sem nær þeim leikjafjölda. Sjá nánar: Tölfræði mfl.kv.
 
* Þetta var 3. mótsleikur HK/Víkings og Tindastóls/Neista í meistaraflokki. HK/Víkingur hefur unnið einn leik og Tindastóll/Neisti tvo. Sjá nánar: Mótherjar.

* Hér má sjá yfirlit yfir alla 22 mótsleiki ársins: Leikir mfl.kv. 2010.

Mynd: Sólveig Þórarinsdóttir skoraði markið.