Knattspyrna

Knattspyrnudeild Víkings hefur framlengt samning sinn við Arnar Bergmann Gunnlaugsson til þriggja ára. Samningurinn er óuppsegjanlegur af beggja hálfu, rétt eins og fyrri samningur var.

Arnar er fyrrum atvinnumaður og landsliðsmaður í knattspyrnu sem lék m.a. með Bolton Wanderers, Leicester City og Stoke City á Englandi en einnig í Hollandi, Þýskalandi, Frakklandi og á Skotlandi. Arnar varð deildarbikarmeistari á Englandi, hefur unnið Íslandsmeistaratitilinn þrisvar sinnum sem leikmaður og bikarmeistaratitilinn tvisvar sinnum sem leikmaður og einu sinni sem þjálfari.

Arnar2

Arnar Gunnlaugsson þjálfari mfl karla í knattspyrnu

Arnar tók við þjálfun meistaraflokks Víkings haustið 2018, eftir að hafa verið aðstoðarþjálfari Loga Ólafssonar á yfirstöðnu tímabili. Allt frá fyrstu æfingu hefur Arnar lagt áherslu á að Víkingur spili jákvæðan fótbolta og innleitt nýjar áherslur í leik liðsins. Undir stjórn Arnars hefur liðið tekið miklum framförum og vakið verðskuldaða athygli. Ungir leikmenn hafa fengið stór hlutverk í liðinu og Arnar hefur fylgt sinni sannfæringu og stefnu frá upphafi, hvort sem er í velgengni eða þegar á móti hefur blásið.

Lið Víkings varð bikarmeistari á fyrsta tímabili undir stjórn Arnars, en þá höfðu liðið 29 ár frá síðasta titli í knattspyrnu hjá félaginu. Undanfarin ár hefur aðstaða til æfinga batnað til muna í Víkinni og telur stjórn deildarinnar félagið vera á góðum stað hvað varðar leikmenn, þjálfarateymi og alla umgjörð um sína afreksmenn.

Knattspyrnudeild Víkings er afar ánægð með framlengingu samnings Arnars og hlakkar til áframhaldandi uppbyggingar.

Áfram Víkingur!

Grant Volterenforte2019 Macron Logo NEG 1
Skrá sig á póstlista Víkings.

 header object clear2 minna